पुँजी बजारको अभूतपूर्व वृद्धिले लगानीको वातावरणमा ल्याएको आत्मविश्वास, अर्थतन्त्रमा विस्तारको संकेत

काठमाडौं, साउन ३-नेपालको सेयर बजार पछिल्लो केही वर्ष यता उतारचढावकै क्रममा रहे पनि आर्थिक वर्ष २०८१/८२ मा भने ऐतिहासिक कीर्तिमान कायम गर्न सफल भएको छ। नेप्से (नेपाल स्टक एक्सचेञ्ज) का अनुसार यो वर्ष २१ खर्ब २४ अर्ब ९१ करोड रुपैयाँको कारोबार भएको छ, जुन अघिल्लो आर्थिक वर्षको तुलनामा १८९.२३% ले बढी हो।

२०८०/८१ मा ७ खर्ब ३४ अर्बको कारोबार भएको थियो भने २०७७/७८ मा अहिलेसम्मकै उच्च १४ खर्ब ५४ अर्बको कारोबार थियो। तर, २०८१/८२ को तथ्यांकले ती सबै रेकर्डहरू तोड्दै नेपालको सेयर बजार लाई एक नयाँ उचाइमा पुर्‍याएको छ।

बजारमा विश्वासको संचार

लगानीकर्ताको आत्मविश्वास, कम्पनीहरूको सक्रियता र नीतिगत सुधारहरूले गर्दा कारोबारमा यस्तो उछाल आएको देखिन्छ। यसले पुँजी बजारको परिपक्वता र आर्थिक स्थायित्वप्रति सकारात्मक संकेत दिएको छ।

बजार पुँजीकरणमा ३१% को वृद्धि

२०८१ असार मसान्तमा बजार पुँजीकरण ३५ खर्ब ५३ अर्ब थियो भने यो आर्थिक वर्षको अन्त्यसम्ममा ४६ खर्ब ५६ अर्ब पुगेको छ। ३१.०५ प्रतिशतको यो वृद्धि सेयर बजारको कुल आकारमा ठूलो छलाङ हो।

सूचीकृत कम्पनी र धितोपत्र संख्या विस्तार

२०८१/८२ को अन्त्यसम्ममा सूचीकृत कम्पनीको संख्या २७२ पुगेको छ।

यस अवधिमा:

1. मर्जरका कारण ३ कम्पनी सूचीबाट हटे
2. ४ नयाँ कम्पनी IPO बाट थपिए
3. कुल ८० करोड ४२ लाख कित्ता नयाँ धितोपत्र सूचीकृत

अर्थतन्त्रमा सकारात्मक प्रभावको अपेक्षा

सेयर बजारको यो वृद्धि केवल आँकडामा सिमित छैन। पुँजी जुटाउने माध्यम बलियो बनेकोले,

1. नयाँ उद्योगमा लगानी सजिलो
2. रोजगार सृजनामा टेवा
3. आर्थिक वृद्धिमा योगदान
   हुने अपेक्षा गरिएको छ।

यद्यपि, बजार स्थायित्व, जोखिम व्यवस्थापन, र लगानीकर्ताको दीर्घकालीन सुरक्षाका लागि नियामक संस्थाहरूले सक्रिय भूमिका खेल्न आवश्यक छ।

शेयर विश्लेषकलाई हराउँदै बाँदरले बढी कमायो — लगानीमा भाग्यको प्रभाव कति?

२०८१/८२ को २१ खर्ब कारोबार केवल संख्याको उपलब्धि होइन, यो बजारको परिपक्वता र आर्थिक प्रणालीमा यसको गहिरो प्रभावको सूचक हो। यो वृद्धि दीर्घकालीन स्थायित्व, पारदर्शिता, र लगानीमैत्री वातावरणद्वारा समर्थित भए मात्र अर्थपूर्ण र दिगो बन्न सक्छ।