काठमाडौं, साउन ९ – थाइल्याण्ड-कम्बोडिया सीमा झडप झनै चर्किएको छ। पछिल्लो जानकारीअनुसार कम्तीमा १४ जनाको ज्यान गएको छ, जसमध्ये १३ जना थाइ नागरिक र एकजना सैनिक रहेका छन्। दुवै देशका सेना साना हतियार, तोपखाना, रकेट प्रहार गर्दै भिडिरहेका छन् भने थाइल्याण्डले हवाई आक्रमण समेत गरेको पुष्टि गरेको छ।

भिडन्तको पछिल्लो अवस्था

थाइ रक्षा मन्त्रालयका प्रवक्ता सुरासन्त कोंगसिरीका अनुसार बिहीबारको दिन मात्रै कम्तीमा ६ स्थानमा भिडन्त भएको छ। सिमा क्षेत्रमा बिछ्याइएको ल्यान्डमाइन विस्फोटमा पाँचजना थाइ सैनिक घाइते भएपछि थाइल्याण्डले बैंककस्थित कम्बोडियाली दूतावासका कूटनीतिज्ञलाई निष्कासन गरेको थियो।

जवाफस्वरूप कम्बोडियाले पनि थाइल्याण्डतर्फ तोप र रकेट प्रहार गरेको छ। यस क्रममा थाइ सेनाले पनि F-16 युद्धविमानमार्फत बमबारी गरेको पुष्टि भएको छ।

मानवीय क्षति र विरोध

थाइ सार्वजनिक स्वास्थ्य मन्त्रालयका अनुसार १३ जना सर्वसाधारण (जसमध्ये बालबालिका पनि छन्) र एकजना सैनिकको मृत्यु भएको छ। साथै, १४ जना सैनिक र ३२ जना सर्वसाधारण घाइते भएका छन्। अधिकांश क्षति सिसाकेट प्रान्तस्थित पेट्रोल पम्प नजिकैको रकेट प्रहारबाट भएको हो।

स्वास्थ्य मन्त्री सोमसाक थेपसुथिनले नागरिक र अस्पतालमाथिको आक्रमणलाई जिनेभा सम्मेलन तथा अन्तर्राष्ट्रिय मानवअधिकार कानुनको उल्लंघन भएको भन्दै कडा आपत्ति जनाएका छन्। उनले कम्बोडियालाई युद्ध अपराध रोक्न र शान्तिपूर्ण सहअस्तित्वको सिद्धान्तमा फर्किन आह्वान गरेका छन्।

स्थानीयको विस्थापन र संकट

झडपका कारण थाइल्याण्ड र कम्बोडियाको सिमानामा पर्ने गाउँहरूका बासिन्दा भाग्न बाध्य भएका छन्। थाइल्याण्डतर्फ मात्रै ४०,००० भन्दा बढी मानिसहरूलाई सुरक्षित स्थानतर्फ सारिएको छ भने कम्बोडियाको ओडार मीन्चे प्रान्तका बासिन्दा पनि राति रिक्सामा टर्च बाल्दै भागिरहेको दृश्य देखिएको छ।

क्षेत्रीय प्रभाव र शान्तिको माग

दक्षिण-पूर्वी एसियाली क्षेत्रका लागि यो झडप गम्भीर समस्या बन्न थालेको विशेषज्ञहरूले बताएका छन्। क्षेत्रीय स्थायित्वमा यसले नकारात्मक असर पार्न सक्छ। कम्बोडियाका प्रधानमन्त्री हुन मानेटले संयुक्त राष्ट्रसंघ सुरक्षा परिषद्को आपतकालीन बैठक माग गरेका छन्।

नेपालको स्टिल निर्यातमा भारतको प्रतिबन्ध : उद्योग क्षेत्रमा गम्भीर संकटको छायाँ

थाइल्याण्ड-कम्बोडिया सीमा झडप तत्काल नरोकेमा मानवीय संकट थप चर्कन सक्ने संकेत देखिएको छ। दुवै देशबीचको संवाद अवरुद्ध देखिएको र एकअर्कालाई दोष दिने प्रवृत्ति कायम रहेकाले तत्काल समाधानको सम्भावना न्यून देखिएको छ।