नेपाल पत्रकार महासंघ र नेपाल बार एसोसिएसनबीचको विवाद हिंसात्मक रूप लिँदा वरिष्ठ पत्रकारहरू अस्पतालमा

काठमाडौं, साउन २८ – जनकपुरमा जग्गा विवाद का क्रममा कानुन व्यवसायीहरूले नेपाल पत्रकार महासंघ, मधेश प्रदेशका पदाधिकारीहरूमाथि निर्घात कुटपिट गरेका छन्। आक्रमणमा परेर महासंघका प्रदेश अध्यक्ष श्याम बन्जारा, महासचिव शैलेन्द्र महतो ‘क्रान्ति’ सहित ६ जना पत्रकार गम्भीर घाइते भएका छन्।

घटनामा महासचिव क्रान्तिको खुट्टाको पैताला भाँचिएको छ भने अध्यक्ष बन्जाराको शरीरका विभिन्न भागमा गम्भीर चोट लागेको छ। त्यस्तै, पत्रकार दिवाकर रायको टाउकोमा चोट लागेकाे छ। सबै घाइतेहरू हाल जनकपुरस्थित प्रादेशिक अस्पतालमा उपचाररत छन्।

के थियो विवाद ?

नेपाल पत्रकार महासंघ, मधेश प्रदेश समितिले जनकपुरको भूतनाथ महादेव मन्दिर दक्षिणतर्फ रहेको गुठी संस्थानको ४ कट्ठा जग्गा वार्षिक ३ लाख १ हजार १ सय रुपैयाँ तिर्ने सर्तमा २० वर्षका लागि लिजमा लिएको थियो। मंगलबार महासंघका पदाधिकारीहरू सोही जग्गा भोगचलन गर्न पुगेका थिए।

तर, नेपाल बार एसोसिएसन धनुषाले गत साउन २० गते सूचना जारी गर्दै उक्त जग्गा कानुन व्यवसायीहरूको गाडी पार्किङका लागि प्रयोग गर्ने घोषणा गरेको थियो। यस घोषणापछि विवाद चुलिँदै गएको थियो।

आक्रमण र सुरक्षा अवस्था

मंगलबार पत्रकार महासंघका पदाधिकारीहरू जग्गा अवलोकनका लागि पुग्दा कानुन व्यवसायीहरूको समूहले उनीहरूलाई घेराउ गर्दै आक्रमण गरेको हो। जिल्ला प्रहरी कार्यालय धनुषाका प्रवक्ता डीएसपी बरुणबहादुर सिंहका अनुसार गुठीको जग्गा भोगचलनका क्रममा दुई पक्षबीच झडप भएको पुष्टि भएको छ।

“झडपको खबर पाउनासाथ ठूलो संख्यामा सुरक्षाकर्मी परिचालन गरी स्थिति नियन्त्रणमा लिइयो,” सिंहले भने। उनका अनुसार पत्रकार महासंघले आधिकारिक रूपमा लिखित उजुरी दिएपछि कानुनअनुसार कारबाही प्रक्रिया अघि बढाइनेछ।

घटनापछि उठेका प्रश्नहरू

यो घटनाले मधेश प्रदेशमा प्रेस स्वतन्त्रता, कानुनी प्रक्रिया र सार्वजनिक सम्पत्ति व्यवस्थापनबारे गम्भीर प्रश्न उठाएको छ। पत्रकार महासंघले यसलाई प्रेस स्वतन्त्रतामाथिको आक्रमणको रूपमा लिँदै दोषीमाथि तत्काल कारबाही गर्न माग गरेको छ।

उमेर नपुग्दै विवाह गराउने वा प्रोत्साहन गर्ने ‘कारबाहीको दायरामा’, सरकारको नयाँ रणनीति सार्वजनिक

प्रहरीले घटनाको थप अनुसन्धान भइरहेको जनाएको छ।