काठमाडौं, भाद्र १५ ।अख्तियार दुरुपयोग अनुसन्धान आयोगले जिल्ला शिक्षा कार्यालय, खोटाङका तत्कालीन जिल्ला शिक्षा अधिकारी डा. गणेश प्रसाद भट्टराई, केशव प्रसाद दाहाल र ज्ञानमणि नेपाल, प्रधानाध्यापक, बिद्यालय व्यवस्थापन समितिका अध्यक्षसमेत १३ जनाविरुद्ध भ्रष्टाचारको मुद्धा दायर गरेको छ ।

खोटाङको हलेसी तुवाचुङ नगरपालिका-४ स्थित लक्ष्मी माध्यमिक बिद्यालय, बडहरेको बिद्यालय भवन निर्माण गर्दा भ्रष्टाचार गरेको आरोप लगाएको छ । अख्तियारका अनुसार, आर्थिक वर्ष २०७१/७२ मा उक्त विद्यालयमा चारकोठे आरसीसी भवन निर्माणका लागि जिल्ला शिक्षा कार्यालयबाट २४ लाख रुपैयाँ र २५ प्रतिशत जनश्रमदानसहित कुल ३० लाख रुपैयाँको लागतमा सम्झौता भएको थियो। तर, अख्तियारको स्थलगत अनुसन्धान तथा प्राविधिक प्रतिवेदनले फिल्डमा जम्मा २ लाख ७२ हजार ३२८ रुपैयाँ बराबरको मात्र काम भएको देखाएको छ।

अख्तियारले तत्कालीन जिल्ला शिक्षा अधिकारीहरू डा. गणेश प्रसाद भट्टराई (१० लाख बिगो), केशव प्रसाद दाहाल (१४ लाख बिगो) र ज्ञानमणि नेपाल (१४ लाख बिगो) विरुद्ध मुद्दा दायर गरेको छ।

त्यसैगरी, जिल्ला शिक्षा कार्यालयकै तत्कालीन लेखा अधिकृत भुवन प्रसाद आचार्य (१० लाख बिगो), लेखापाल सुरेश कुमार श्रेष्ठ (२४ लाख बिगो) र सब-इन्जिनियर शिवराज राई (२४ लाख बिगो) विरुद्ध पनि आरोपपत्र दायर भएको छ।

सब-इन्जिनियर राईलाई गलत कार्यसम्पन्न प्रतिवेदन बनाएकोमा थप कारबाहीको माग गरिएको छ।

यता, विद्यालय व्यवस्थापन समितिका तत्कालीन अध्यक्षहरू पृथ्वी दाहाल (८ लाख बिगो) र शेष कुमार पौड्याल (८ लाख बिगो र थप ५ लाख १२० रुपैयाँ हिनामिना) तथा तत्कालीन प्रधानाध्यापकहरू राजेन्द्र प्रसाद दाहाल (८ लाख बिगो), ऋषिराम पोखरेल (८ लाख बिगो) र नयन कुमार राई (५ लाख १२० रुपैयाँ हिनामिना) लाई पनि प्रतिवादी बनाइएको छ।

विद्यालयकी तत्कालीन लेखापाल सीता कार्की (१६ लाख बिगो र थप ५ लाख १२० रुपैयाँ हिनामिना) र भवन निर्माणको जिम्मेवारी पाएका अर्जुन तामाङ (१६ लाख बिगो) लाई पनि मतियारको कसुरमा मुद्दा दायर गरिएको छ।

अख्तियारले सबै प्रतिवादीहरूलाई बिगोबमोजिम जरिवाना, कैद सजाय र बिगो असुलउपर गर्न मागदाबी गरेको छ।