आखिर के-के हुन् त मेस्सी र यामाललाई जोड्ने १९ नम्बर का ती अद्भूत संयोगहरू, जसले पूरै फुटबल जगतलाई अचम्ममा पारेको छ?
काठमाडौँ, साउन ३ । “भगवान् आफ्ना कथाहरू आफैँ लेख्छन्” फुटबल इतिहासमा यो भनाइ आज जति सान्दर्भिक कहिल्यै भएको थिएन। आज जुलाई १९ मा न्यूयोर्कको ऐतिहासिक मेटलाइफ स्टेडियममा जब डिफेन्डिङ च्याम्पियन अर्जेन्टिना र स्पेन फिफा विश्वकप २०२६ को फाइनलका लागि मैदान उत्रिँदै छन्, तब विश्वभरका समर्थकहरू एउटा यस्तो अलौकिक संयोगलाई लिएर स्तब्ध छन्, जसले भौतिक विज्ञान र सामान्य तर्क दुवैलाई चुनौती दिएको छ।
यो भिडन्त केवल ३९ वर्षीय भेट्रान लियोनेल मेस्सी र १८ वर्षीय सनसनी लामिन यामालबीचको पहिलो अन्तर्राष्ट्रिय भिडन्त मात्र होइन। यो त एउटा यस्तो रहस्यमयी संयोग हो, जसको केन्द्रमा एउटै नम्बर घुमिरहेको छ नम्बर १९।
मेस्सी र यामालको जीवनलाई जोड्ने नम्बर १९ का यी संयोगहरू सामान्य दिमागले सोच्न सक्नेभन्दा धेरै पर छन्:
१. १९ वर्षपछिको त्यो ऐतिहासिक पुनर्मिलन
सन् २००७ मा बार्सिलोनाको क्याम्प नाउमा क्याटालन अखबार स्पोर्ट (Sport) र युनिसेफ (UNICEF) को एउटा च्यारिटी राफल (लक्की ड्र) भएको थियो। त्यसमा छानिएका भाग्यशाली बच्चाले बार्सिलोनाका पहिलो रोजाइका खेलाडीसँग तस्बिर खिच्ने मौका पाउँथे। भाग्यको खेल भनौँ, ५ महिनाका लामिन यामालको जोडी त्यतिबेलाका युवा स्टार लियोनेल मेस्सीसँग पर्न गयो। मेस्सीले यामाललाई प्लास्टिकको बाथटबमा राखेर नुहाइदिएको त्यो ऐतिहासिक फोटोसुट भएको ठीक १९ वर्षपछि आज यी दुई खेलाडी विश्वकपको सबैभन्दा ठूलो मञ्चमा आमनेसामने हुँदै छन्।
२. जर्सी नम्बर १९ को विरासत
सन् २००६ देखि २००८ सम्म बार्सिलोनामा खेल्दा लियोनेल मेस्सीले १९ नम्बरको जर्सी लगाउने गर्थे (किनभने १० नम्बर जर्सी रोनाल्डिन्होको थियो)। आज ठीक १९ वर्षपछि, लामिन यामालले स्पेनको राष्ट्रिय टोलीबाट मैदान उत्रिँदा त्यही ऐतिहासिक १९ नम्बरकै जर्सी लगाएका छन्। अचम्मको कुरा त के छ भने, यामालले अहिले बार्सिलोनामा मेस्सीको विरासत बोकेको ‘१० नम्बर’ जर्सी लगाउँछन्, तर स्पेनका लागि भने उनी १९ नम्बरमै देखिन्छन्।
३. १९ वर्षकै उमेरमा विश्वकप डेब्यु र जर्सी संयोग
मार्काका अनुसार यी दुवै खेलाडीको विश्वकप यात्रामा पनि १९ को ठूलो भूमिका छ। लियोनेल मेस्सीले सन् २००६ मा आफ्नो पहिलो विश्वकप खेल्दा उनी १९ वर्षका थिए र उनले अर्जेन्टिनाका लागि १९ नम्बरकै जर्सी लगाएर डेब्यु गरेका थिए। ठीक त्यसैगरी, लामिन यामालले पनि आफ्नो करियरको पहिलो विश्वकप यही संस्करणमा खेलिरहेका छन्, जहाँ उनले १९ नम्बरकै जर्सी लगाएर विश्वकप डेब्यु गरे।
४. गणितको अनौठो हिसाब (३९ – २० = १९)
सन् २००७ मा जब त्यो चर्चित फोटो खिचिएको थियो, मेस्सी २० वर्षका थिए। आज सन् २०२६ को फाइनल खेल्दै गर्दा मेस्सी ३९ वर्षका भइसकेका छन्। मेस्सीको आजको उमेरबाट त्यतिबेलाको उमेर घटाउँदा (३९ – २०) फेरि पनि नतिजा १९ नै आउँछ! यसैगरी, लामिन यामालले भर्खरै मात्र जुलाई १३ मा आफ्नो जन्मदिन मनाएका छन्।
५. फाइनलको मिति र हलिउड कनेक्सन
तथ्यहरू यतिमै रोकिँदैनन्। अर्जेन्टिना र स्पेनबीचको यो बहुप्रतीक्षित फिफा विश्वकप २०२६ को फाइनल खेल आज जुलाइको १९ तारिख (July 19) मै खेलिँदै छ। खेल पण्डितहरूले यसलाई चर्चित हलिउड निर्देशक जोएल शुमाकरको फिल्म “२३” सँग तुलना गरेका छन्, जहाँ अभिनेता जिम केरी एउटा नम्बरप्रति पागल हुन्छन्। अचम्मको कुरा, त्यो फिल्म रिलिज भएको पनि ठीक १९ वर्ष नै पुगेको छ!
‘बोनस ट्र्याक’ संयोग
यस विश्वकपमा फाइनल अघिसम्म अर्जेन्टिनाले कुल १९ गोल गरिसकेको छ। अर्कोतर्फ, स्पेनका लामिन यामालको यो विश्वकपमा गोल र असिस्ट (गोल गर्न पास दिएको) संख्या मिलाएर कुल १८ पुगेको छ। के आज आइतबारको फाइनलमा उनको यो संख्या पनि १९ पुग्ला?
त्यो ऐतिहासिक तस्बिर खिच्ने फोटोग्राफर जोआन मोनफोर्ट भन्छन्, “मेस्सी निकै लजालु स्वभावका थिए, उनलाई बच्चा कसरी समात्ने भन्ने पनि थाहा थिएन। तर आज लाग्छ, मेस्सीले त्यतिबेला त्यो सानो बच्चालाई पानीले नुहाइदिएका मात्र थिएनन्, बरु फुटबलको नयाँ राजा बन्ने आशीर्वाद (बप्तिस्मा) दिएका रहेछन्।”
३९ वर्षका महान् फुटबलर मेस्सी आफ्नो सम्भवतः अन्तिम विश्वकपमा उपाधि रक्षा गर्ने दाउमा छन् भने भर्खरै उदाएका लामिन यामाल फुटबल इतिहासमा आफ्नो नयाँ साम्राज्य खडा गर्न तयार छन्। नम्बर १९ को यो जादुमयी ‘कन्स्पिरेसी’ ले आजको फाइनललाई खेल मात्र होइन, भाग्यले पहिल्यै निश्चित गरेको एउटा ऐतिहासिक महागाथा बनाइदिएको छ।
तपाईंको प्रतिक्रिया