एयर इन्डियाको अर्को संकट: फुकेटबाट दिल्ली आउँदै गरेको विमानमा बमको हल्ला, आकस्मिक अवतरण
१५६ यात्रु सवार विमान थाईल्यान्डको फुकेटमा सुरक्षित अवतरण, बम भेटिएन
काठमाडौँ, जेठ ३० — एयर इन्डियाको फुकेट (थाईल्यान्ड) बाट दिल्ली गन्तव्यतर्फ उडेको फ्लाइट AI-379 ले आज शुक्रबार आपतकालीन अवतरण गर्यो। विमानमा बम रहेको हल्ला आएपछि थाई अधिकारीहरूले विमानलाई फुकेट अन्तर्राष्ट्रिय विमानस्थलमा सुरक्षित अवतरण गराएका हुन्।
विमानमा १५६ जना यात्रु सवार थिए। उडानको क्रममा सुरक्षासम्बन्धी अलर्ट प्राप्त भएपछि पाइलटले विमानलाई Andaman समुद्र क्षेत्रमा घुमाउँदै फुकेटतर्फ फिर्ता ल्याएका थिए।
आपतकालीन योजना अनुसार यात्रुहरू बाहिर निकालिए
फ्लाइटको आपतकालीन अवतरण पछि विमानलाई तुरुन्तै सुरक्षाकर्मीहरूले घेरेका थिए र यात्रुहरूलाई विमानबाट बाहिर निकालिएको थियो। थाई विमानस्थल प्रशासनका अनुसार आपतकालीन योजनाअनुसार सबै प्रक्रिया अपनाइएको थियो।
बम नभेटिएको पुष्टि, अनुसन्धान जारी
थप अनुसन्धानपछि विमानभित्र कुनै बम भेटिएको छैन। प्रारम्भिक जाँच अनुसार, यो सम्भवतः फर्जी हल्ला हुनसक्ने अधिकारीहरूको अनुमान छ। विमानभित्र बमको चेतावनी लेखिएको नोट भेटिएका कारण ती नोट पाउने यात्रुलाई अधिकारीहरूले सोधपुछ गरिरहेका छन्।
हिजोको क्र्यासपछि आज बम त्रास: एयर इन्डिया संकटमा
एयर इन्डियाका लागि पछिल्ला दुई दिन निकै संकटपूर्ण बनेका छन्। हिजो, अर्थात बिहीबार, भारतको अहमदाबादबाट उडेको एउटा विमान टेकअफ लगत्तै दुर्घटनामा परेको थियो जसमा २४० जनाभन्दा बढीको मृत्यु भएको पुष्टि भएको छ। त्यसमध्ये एक जना मात्र यात्रु बाँच्न सफल भएका छन्।
अहमदाबादमा एयर इन्डियाको जहाज दुर्घटना: यात्रु उछिट्टिएर बाँचेको दाबी
यात्रु सुरक्षाप्रति गम्भीर प्रश्न
लगातार दुई दिनमा दुइटा गम्भीर घटना सार्वजनिक भएपछि एयर इन्डियाको सुरक्षा प्रबन्ध, आन्तरिक व्यवस्था र संकट व्यवस्थापन क्षमताप्रति प्रश्न उठेको छ। यात्रुहरूको विश्वसनीयता र कम्पनीको छविमा समेत प्रत्यक्ष असर पर्ने विज्ञहरूको चेतावनी छ।
तपाईंको प्रतिक्रिया