काठमाडौं, मंसिर ४ – सर्लाहीको बरहथवा नगरपालिका–८ स्थित श्री माध्यमिक विद्यालय आनन्दनगरमा एक शिक्षिकाले कक्षा चारका विद्यार्थीहरूलाई निर्घात कुटपिट गरेको घटना सार्वजनिक भएको छ। कुटपिटबाट आठ जना छात्रा घाइते भएका छन्।

नगरपालिकाले नियुक्त गरेको स्वयंसेवक शिक्षिकाको रूपमा कार्यरत गीता कुसवाहाले १० वर्षीया रूपा कुमारी पासवानसहित अन्य विद्यार्थीलाई बाँसको लट्ठीले हातमा निरन्तर प्रहार गरेको विद्यार्थी तथा अभिभावकको आरोप छ। कुटाइका कारण केही विद्यार्थी बेहोससमेत भएको स्थानीय जनप्रतिनिधिले जनाएका छन्।

घाइते रूपा कुमारीले शिक्षिकाले पढाएको नबुझेको भनेर उजुरीपेटिकामा गुनासो राखेपछि शिक्षिकाले रिसियलो व्यवहार गर्दै होमवर्क नगरेको बहानामा कुटपिट गरेको बताइन्।
“म्यामले बाँसको लठ्ठीले धेरै चोटि हान्नुभयो, हात सुन्निएर उठाउनै कठिन भयो,” उनले भनिन्।

वडा अध्यक्ष राजकिशोर महतोका अनुसार विद्यालय नजिकै वडा कार्यालयमा बसिरहेका बेला विद्यार्थीको चिच्याहट सुनेपछि उनी तत्काल कक्षाकोठामा पुगे।
“केही बालिकाहरू बेहोस हुँदैथिए, ढिला नभई एम्बुलेन्स बोलाएर अस्पताल पठाइयो,” उनले भने।

प्रदेश प्रहरीका अनुसार कुटिएका छात्राहरूको शरीरमा बाह्य चोटपटक धेरै नदेखिए पनि मानसिक आघात र कष्ट धेरै भएको बताइएको छ। घटना सार्वजनिक भएपछि शिक्षिका गीता कुसवाहा र विद्यालयका प्रधानाध्यापक रामईश्वर महतो सम्पर्कविहीन भएका छन्।

विद्यार्थी तथा अभिभावकको भनाइअनुसार शिक्षिकाको अक्षर अस्पष्ट र पढाउने शैली कमजोर रहेकाले विद्यार्थीहरूले धेरै पटक सिकाइसम्बन्धी गुनासो राखेका थिए।

स्थानीय अभिभावकहरू विद्यालय व्यवस्थापन र नगरपालिकासँग कडा कारबाहीको माग गर्दै विद्यालय परिसरमा आक्रोशित बनेका छन्।

टीयू क्रिकेट मैदानबाट घर फर्किन निःशुल्क बस सेवा, ४ रुटमा सञ्चालन

यसैबीच, प्रहरीले घटनाबारे प्रारम्भिक अनुसन्धान सुरु गरेको छ।