काठमाडौँ, असार २९ । एशियन डेभलपमेन्ट बैंक (एडीबी) ले सन् २०२६ मा नेपालको आर्थिक वृद्धिदर ३.९ प्रतिशत मात्र हुने प्रक्षेपण गरेको छ। विश्वव्यापी रूपमा देखिरहेका आर्थिक चुनौतीहरू कायमै रहेका कारण नेपालको अर्थतन्त्रमा त्यसको प्रत्यक्ष असर पर्ने एडीबीको भनाइ छ।

यो प्रक्षेपण नेपाल सरकारले आगामी आर्थिक वर्षका लागि राखेको ७ प्रतिशतको महत्त्वाकाङ्क्षी वृद्धिदरको लक्ष्यभन्दा निकै कम हो। साथै, सन् २०२५ का लागि अनुमान गरिएको ४.४ प्रतिशतको आर्थिक वृद्धिदरभन्दा पनि सन् २०२६ को यो नयाँ प्रक्षेपण तल झरेको छ।

सरकारप्रति अविश्वास र नीतिगत बाधाहरू

एडीबीको यो संशोधित परिदृश्य (आउटलुक) ले सरकारले व्यापार व्यवसाय र आर्थिक वृद्धिका लागि विभिन्न योजनाहरू अघि सारे पनि नेपालले आगामी दिनमा गम्भीर आर्थिक चुनौती र दबाबहरूको सामना गर्नुपर्ने स्पष्ट पारेको छ।

यसका साथै, निजी क्षेत्र र लगानीकर्ताहरूमा सरकारप्रतिको विश्वसनीयता घट्दै जानु पनि अर्थतन्त्र सुस्ताउनुको मुख्य कारण मानिएको छ। अस्थिर राजनीतिक वातावरण र बारम्बार परिवर्तन भइरहने सरकारी नीतिका कारण व्यवसायीहरू ढुक्क भएर लगानी गर्न सकिरहेका छैनन्। वर्तमान सरकारी नीतिहरू आर्थिक विकास र लगानी प्रवर्द्धन अनुकूल नभएको (Not Favouring Growth) र यसले बजारमा उत्साह भर्न नसकेको गुनासो उद्योगीहरूको छ।

जटिल नीतिगत प्रक्रिया, करका दरहरूमा हुने फेरबदल र निजी क्षेत्रलाई प्रोत्साहन गर्ने ठोस कार्यक्रमको अभावका कारण निकट भविष्यमै व्यावसायिक क्षेत्र र बजारका लागि सहज वा सुखद दिनहरू आउने सङ्केत नदेखिएको अर्थविद्हरू बताउँछन।

मल नपाएर भारत पुगेका सर्लाहीका दुई किसान दाजुभाइ भारतीय जेलमा