काठमाडौं, मंसिर १२ – कपिलवस्तुमा प्रधानमन्त्री कार्कीले महिला हिंसाविरुद्धको १६ दिने अभियान शुभारम्भका क्रममा व्यक्त गरेको अभिव्यक्तिप्रति मुस्लिम समुदायले कडा आपत्ति जनाउँदै बिहीबार साँझ मायादेवी गाउँपालिकाको पकडी चोकमा विरोध प्रदर्शन गरेका छन्। समुदायका अगुवाहरूले अभिव्यक्तिले मुस्लिम महिलाको अपमान भएको आरोप लगाएका छन्।

स्थानीय मुस्लिम अगुवा तथा बासिन्दाहरू पकडी चोकमा भेला भएर प्रधानमन्त्रीविरुद्ध नाराबाजी गरेका थिए। उनीहरूले प्रधानमन्त्रीको अभिव्यक्तिले धार्मिक सहिष्णुता र सामाजिक मर्यादामाथि आघात पुर्‍याएको भन्दै फोटो तथा पुतला जलाए ।

यसै विषयमा सदरमुकाम तौलिहवामा पनि मुस्लिम अगुवाहरूले शान्तिपूर्ण प्रदर्शन गरी आफ्नो विरोध सार्वजनिक रूपमा व्यक्त गरेका छन्। प्रदर्शनकारीहरूले प्रधानमन्त्री कार्कीले विवादित अभिव्यक्ति तुरुन्त फिर्ता लिएर सार्वजनिक रूपमा माफी माग्नुपर्ने माग राखेका थिए।

विरोध कार्यक्रममा बोल्दै नेपाली कांग्रेसका नेता अतहर कमालले प्रधानमन्त्रीको अभिव्यक्तिले मुस्लिम महिलाको पहिचान र मर्यादामाथि गम्भीर प्रहार गरेको बताए।
उनले भने, “प्रधानमन्त्रीको अभिव्यक्तिले मुस्लिम समुदायलाई गलत रूपमा चित्रण गरेको छ। यो केवल एक समुदायमाथि मात्र नभई राष्ट्रको बहुलवादी मूल्यहरूमाथि पनि चुनौती हो।”

त्यस्तै, मुस्लिम अगुवाहरू रउफ अहमद खाँ र हजरत अलीले देशको कार्यकारी प्रमुखबाट आएको यस्तो अभिव्यक्ति अस्वीकार्य भएको भन्दै तत्काल सच्याउन माग गरे।

विरोधपछि मुस्लिम अगुवाहरूको टोलीले प्रमुख जिल्ला अधिकारी (प्रजिअ) जनार्दन गौतममार्फत राष्ट्रपतिलाई ज्ञापनपत्र बुझाएको छ। ज्ञापनपत्रमा प्रधानमन्त्रीको अभिव्यक्तिले धार्मिक सद्भाव, सामाजिक सहिष्णुता र सामुदायिक सम्बन्धमा प्रतिकूल असर पारेको भन्दै राष्ट्रपतिको ध्यानाकर्षण गराइएको छ।
तिलिचो तालछेउ खेलियो रेस्लिङ : गिनिज बुकमा नेपालको नाम