नाकको शल्यक्रियामा चिकित्सकीय लापरबाही: नोबेल अस्पतालमा ७ वर्षीय बालकको आँखाको ज्योति गुम्यो
काठमाडौं, मंसिर ८ – विराटनगरको नोबेल मेडिकल कलेजमा नाकको साधारण शल्यक्रिया गर्ने क्रममा इटहरी उपमहानगरपालिका–१ हासपोसाका ७ वर्षीय बालक जेनिश पाठकको दाहिने आँखाको ज्योति गुमेको छ। चिकित्सकीय लापरबाहीको गम्भीर आरोपसहित परिवारले जिल्ला प्रशासन कार्यालय मोरङमा उजुरी दर्ता गरेका छन्।
बालक जेनिशको नाकको दाहिनेपट्टिको प्वालमा मासु पलाएपछि आफन्तले ४ मंसिरमा नोबेल मेडिकल कलेजमा भर्ना गराएका थिए। चिकित्सकको सल्लाहअनुसार ५ मंसिरमा शल्यक्रिया सम्पन्न भयो। तर अप्रेसनको भोलिपल्ट नै अस्पतालले बालकलाई हतारहतार डिस्चार्ज गरेको थियो।
शल्यक्रियापछि बालकको दाहिने आँखाको ज्योति गुमेको पाइयो। आँखा भित्रतिर पसेको र गम्भीर चोट लागेको देखिएपछि परिवारले विराटनगर आँखा अस्पताल रानीमा भर्ना गराए।
आँखा अस्पतालको निष्कर्ष
विराटनगर आँखा अस्पतालका चिकित्सकले जाँच गरेपछि बालकको दाहिने आँखाको भित्री भाग ड्यामेज भएको पुष्टि गरे। चिकित्सकले आँखाको ज्योति पुन: फर्कने सम्भावना २ प्रतिशतभन्दा पनि कम रहेको जानकारी दिएका छन्।
आँखा अस्पतालका विशेषज्ञहरूले नाकको शल्यक्रिया गर्दा आँखाको भित्री भागको हड्डी निकालेका कारण आँखामा गम्भीर चोट लागेको निष्कर्ष निकालेका छन्। यस्तो अवस्थामा थप शल्यक्रिया गर्नु पनि उपयुक्त नहुने उनीहरूको भनाइ छ।
परिवारको आरोप
बालकका मामा श्रीकृष्ण प्रसाईंले नोबेल मेडिकल कलेजले गम्भीर लापरबाही गरेको आरोप लगाएका छन्।
“बालकको स्वास्थ्यमाथि नोबेल मेडिकल कलेजले गम्भीर लापरबाही गरेको छ। ७ वर्षको उमेरमा आँखाको ज्योति नै गुम्यो,” मामा श्रीकृष्णले भने, “हामीलाई डिपार्टमेन्ट हेडले शल्यक्रिया गर्ने भनेका थिए, तर सिकारु डाक्टरलाई खटाइएको रहेछ।”
परिवारका अनुसार शुक्रबार नाकको अप्रेसनपछि निस्किएका चिकित्सकले नाक भित्र पलाएको मासु आँखासम्म पुगेकाले आँखामा सामान्य समस्या भएको बताएका थिए। तर आफन्तले भेट्दा बालकको एउटा आँखाको ज्योति गुमिसकेको थियो। सोधिखोजी गर्दा भोलिपल्ट आँखा अस्पताल लैजानु भन्दै हतारहतार डिस्चार्ज गरिएको उनीहरूको गुनासो छ।
लापरबाही गर्ने अस्पताल र चिकित्सकलाई कारबाही गर्न माग गर्दै मामा श्रीकृष्णले जिल्ला प्रशासन कार्यालय मोरङमा उजुरी दिएका छन्। उनले अस्पताल, उपचारमा संलग्न डा. प्रज्वल श्रेष्ठ र कविराज बास्तोलालाई कारबाहीको माग गर्दै निवेदन दिएका हुन्।
प्रशासनको प्रतिक्रिया
उजुरीपछि छानबिनका लागि जिल्ला प्रहरी कार्यालयमा पठाएको मोरङका प्रमुख जिल्ला अधिकारी युवराज कटेलले जानकारी दिएका छन्।
“बालकको आँखा गुमेको विषयलाई गम्भीर रूपमा लिएका छौं। उजुरीपछि छानबिनका लागि प्रहरीमा पठाएका छौं,” उनले भने, “प्रहरीको रिपोर्टपछि मेडिकल काउन्सिलसँग समन्वय गरेर कारबाही प्रक्रिया अघि बढाउँछौं।”
कटेलले कारबाहीका लागि चिकित्सक टोलीसँग पनि परामर्श गर्ने बताएका छन्।
चिकित्सकको सफाइ
उपचारमा लापरबाही गरेको विषयमा बुझ्न खोज्दा नोबेल मेडिकल कलेज प्रशासन सम्पर्कमा आउन चाहेन।
तर बालकको उपचारमा संलग्न डा. प्रज्वल श्रेष्ठले नाकको शल्यक्रिया गर्दा आँखामा समस्या भएको स्वीकार गरे। यद्यपि उनले लापरबाही नभएको दाबी गरे।
“बालकको आँखाको साइटतिर पनि रोग गएको थियो। त्यहाँबाट पलाएको मासु निकाल्दा आँखाको साइटको बोन (हड्डी) पनि निकाल्नुपर्यो। त्यो निकाल्दा आँखाको भाग एक्सपोज भएर चोट लागेको हो,” उनले भने।
डा. श्रेष्ठले नाकको शल्यक्रिया गर्दा कम्प्लिकेसन आउन सक्ने तर सबै केसमा होइन भन्ने तर्क गरे। “हरेक नाकको सर्जरीमा हुने कम्प्लिकेसन होइन, तर नाकको सर्जरीमा हुनसक्ने कम्प्लिकेसन हो,” उनले भने, “नाक र आँखा सँगै हुने भएकोले रेयर कम्प्लिकेसन हो।”
बालकको रिपोर्ट हेरेका एक चिकित्सक उपचारमा लापरबाही भएको हुनसक्ने बताउँछन्।
“शल्यक्रिया अघिको प्रोसेसमा कम्प्लिकेसन कहाँसम्म पुग्छ भन्ने अनुमान गर्न सकिन्छ, त्यस्तो विषयमा बढी सतर्क हुनुपर्छ,” ती चिकित्सकले भने, “आँखासम्म इन्जुरी पुगेको हुँदा चिकित्सकले पूर्वतयारी अपनाउनुपर्छ।”
तपाईंको प्रतिक्रिया